శ్రీ కనకధార స్తోత్రం (ఆదిశంకరాచార్య విరచితం)

 శ్రీ కనకధార స్తోత్రం (ఆదిశంకరాచార్య విరచితం) 
శ్రీ కనకధార స్తోత్రమ్

అంగం హరేః పులకభూషణమాశ్రయంతీ

భృంగాంగనేవ ముకులాభరణం తమాలమ్ |

అంగీకృతాఖిలవిభూతిరపాంగలీలా

మాంగల్యదాస్తు మమ మంగళదేవతాయాః || 1 ||

ముగ్ధా ముహుర్విదధతీ వదనే మురారేః

ప్రేమత్రపాప్రణిహితాని గతాగాతాని |

మాలా దృశోర్మధుకరీవ మహోత్పలే యా

సా మే శ్రియం దిశతు సాగరసంభవాయాః || 2 ||

ఆమీలితాక్షమధిగమ్య ముదా ముకుందం

ఆనందకందమనిమేషమనంగతంత్రమ్ |

ఆకేకరస్థితకనీనికపక్ష్మనేత్రం

భూత్యై భవేన్మమ భుజంగశయాంగనాయాః || 3 ||

బాహ్వంతరే మధుజితః శ్రితకౌస్తుభే యా

హారావలీవ హరినీలమయీ విభాతి |

కామప్రదా భగవతో'పి కటాక్షమాలీ

కల్యాణమావహతు మే కమలాలయాయాః || 4 ||

కాలాంబుదాళిలలితోరసి కైటభారేః

ధారాధరే స్ఫురతి యా తడిదంగనేవ |

మాతుస్సమస్తజగతాం మహనీయమూర్తిః

భద్రాణి మే దిశతు భార్గవనందనాయాః || 5 ||

ప్రాప్తం పదం ప్రథమతః ఖలు యత్ప్రభావాత్

మాంగల్యభాజి మధుమాథిని మన్మథేన |

మయ్యాపతేత్తదిహ మంథరమీక్షణార్థం

మందాలసం చ మకరాలయకన్యకాయాః || 6 ||

విశ్వామరేంద్రపదవిభ్రమదానదక్షం

ఆనందహేతురధికం మురవిద్విషో'పి |

ఈషన్నిషీదతు మయి క్షణమీక్షణార్ధమ్

ఇందీవరోదరసహోదరమిందిరాయాః || 7 ||

ష్టేష్టావిశిష్టమతయో'పి యయా దయార్ద్ర

దృష్ట్యా త్రివిష్టపపదం సులభం లభంతే |

దృష్టిః ప్రహృష్టకమలోదరదీప్తిరిష్టాం

పుష్టిం కృషీష్ట మమ పుష్కరవిష్టరాయాః || 8 ||

దద్యద్దయానుపవనో ద్రవిణాంబుధారామ్

అస్మిన్నకించన విహంగశిశౌ విషణ్ణే |

దుష్కర్మఘర్మమపనీయ చిరాయ దూరం

నారాయణప్రణయినీనయనాంబువాహః || 9 ||

గీర్దేవతేతి గరుడధ్వజసుందరీతి

శాకంభరీతి శశిశేఖరవల్లభేతి |

సృష్టిస్థితిప్రలయకేలిషు సంస్థితాయై

తస్యై నమస్త్రిభువనైకగురోస్తరుణ్యై || 10 ||

శ్రుత్యై నమో'స్తు శుభకర్మఫలప్రసూత్యై

రత్యై నమో'స్తు రమణీయగుణార్ణవాయై |

శక్త్యై నమో'స్తు శతపత్రనికేతనాయై

పుష్ట్యై నమో'స్తు పురుషోత్తమవల్లభాయై || 11 ||

నమో'స్తు పద్మాననసుందర్యై

నమో'స్తు సోమోదరసోదరాయై |

నమో'స్తు నారాయణవల్లభాయై

నమో'స్తు నాకీరసపూజితాయై || 12 ||

నమో'స్తు విష్ణోరురసి స్థితాయై

నమో'స్తు లక్ష్మ్యై కమలాలయాయై |

నమో'స్తు దైత్యాంతకవల్లభాయై

నమో'స్తు తార్క్ష్యావుధవల్లభాయై || 13 ||

నమో'స్తు దేవ్యై భృగునందనాయై

నమో'స్తు విష్ణోరురసి స్థితాయై |

నమో'స్తు లక్ష్మ్యై కమలాలయాయై

నమో'స్తు దామోదరవల్లభాయై || 14 ||

నమో'స్తు కాంత్యై కమలేక్షణాయై

నమో'స్తు భూత్యై భువనప్రసూత్యై |

నమో'స్తు దేవాదిభిరర్చితాయై

నమో'స్తు నందాత్మజవల్లభాయై || 15 ||

సంపత్కరాణి సకలేంద్రియనందనాని

సామ్రాజ్యదానవిభవాని సరోరుహాక్షి |

త్వద్వందనాని దురితాహరణోద్యతాని

మామేవ మాతరనిశం కలయంతు మాన్యే || 16 ||

యత్కటాక్షసముపాసనావిధిః

సేవకస్య సకలార్థసంపదః |

సంతనోతి వచసా మానసేన వా

త్వాం మురారిహృదయేశ్వరీం భజే || 17 ||

సరసిజనిలయే సరోజహస్తే

ధవళతమాంశుకగంధమాల్యశోభే |

భగవతి హరివల్లభే మనోజ్ఞే

త్రిభువనభూతికరి ప్రసీద మహ్యమ్ || 18 ||

దిగ్ధస్తిభిః కనకకుంభముఖావసృష్ట

స్వర్వాహినీ విమలచారుజలాప్లుతాంగీమ్ |

ప్రాత్నర్నమామి జగతాం జననీమశేష

లోకాధినాథగృహిణీమమృతాబ్ధిపుత్రీమ్ || 19 ||

కమలే కమలాక్షవల్లభే త్వం

కరుణాపూరతరంగితైరపాంగైః |

అవలోకయ మామకించనానాం

ప్రథమం పాత్రమకృతిమం దయాకోః || 20 ||

దేవి ప్రసీద జగదీశ్వరి లోకమాతః

కల్యాణగాత్రి కమలాలేక్షణజీవనాథే |

దారిత్య్రభీతిహృదయం శరణాగతం మాం

ఆలోకయ ప్రతిదినం దయనీయదృష్ట్యా || 21 ||

స్తువంతి యే స్తుతిభిరమూభిరన్వహం

త్రయీమయీం త్రిభువనమాతరం రమామ్ |

గుణాధికా ముదితమనోధిణో భువి

భవంతే తే భువి బుధభావితాశయాః || 22 ||

ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ కనకధార స్తోత్రం సంపూర్ణమ్.

Download For PDF 🔗🔗👇👇